Osel je kratko blicnul tri put, pa još tri put i onda se ugasil. Osel, to je onaj „osobni elektronski lokator“, tak ga mi od milja zovemo tu med našim bregima. On služi za osobnu komunikaciju, ali i za kontrolu kretanja, kao i za sve upute koje nam daje policija. Ja sam ga, mam kaj su mi ga denuli na ruku, naštimal tak da mi samo svetli. Nemrem podnesti kad počme onak brenčati saki put gda me nehče nazove. Skinuti ga ne smem jer, ak ga skinem, mam bu mi policija pokucala na vrata i onda se zna kaj sledi. Rešt i globa. I to tolka da ti se zavrti v glavi gorje neg posle najgorjeg delanca.
A zoveju me i dan i noč, mira nemam od kad sem v kleti instaliral aparat kaj ga je po skrivečki zgruntal moj mlajši sinek Štefek dok je bil doma na ferijama. Moj starejši, Jožek, on je više na mene, nigdar ni bil preveč zainteresiran za školu. Furt je ganjal loptu i sad igra za Bajerna kak profesionalec, od njega niš koristi. Ali Štefek, to je glava, on je najpametnejši u familiji. Študira tehnološke nauke tam na Sorboni, v Parizu. Taj Štefekov aparat je bok i bormeč prava bomba. Ne razmem se baš preveč u tehniku, znam doduše zavarit ogradu na dvorišću ili promenit kotlić na šekretu, al kak to čudo dela, u to se ne razmem. Samo znam da dojavi ak se u blizini najde kontrolni policijski dron i mam blokira se njegove senzore. Ni onaj Ličan, kak se ono zval, aha, Tesla, ni taj Ličan se ne bi sramil da ga je zmislil. No dobro, da vas sad ne zamaram preveč, kad mi je Osel zablicnul prešel sam prstom prek detektora, u virtualnom niskonaponskom trodimenzionalnom polju za komunikaciju pojavil se sused Franc i značajno mi dva put namignul z levim okom.
– Jel imaš koju puricu za prodati? – upital je tihim glasom.
– Imam dve – odgovoril sam još tišje i namignul dva put z desnim okom. To je bil naš tajni signal da je zrak čist.
– Dobro, onda bum ti dovel jednog Dalmoša, on bi kupil puricu. Al odmah, ak može.
Purica, to je šifra za onaj aparat kaj ga je Štefek napravil.
– Može, dojdite k meni vu klet.
Na brzaka sam se oblekel, sel u traktora z električnim pogonom i odvezel se u gorice. Bilo je več dost kasno, ali posel je posel. Neki dan su mi tak bili neki dečki iz Baranje, jučer je čak bil i jen Talijan koji je rekel da bi se tam pri njemu na Siciliji dalo čudaj tih aparatov prodati. Za ponedelek su mi se najavila dva Francuza, kak je krenulo još bu došlo do ekspanzije na europska tržišta. Sve u svemu, posel je išel sve boljše i boljše i ni red da se sad ja nekaj žalim.
Franc i Dalmoš su već čekali pri kleti, z utrnutim svetlima. Znad brege je zišel puni mesec, a na nebu ni bilo ni jednog oblaka, tak da nismo morali paliti lampaša. Otprl sam lesu i svi smo se tiho ušuljali u klet, pazeći da ne galamimo preveč. Dronovi imaju uši. Seli smo za stol, upalil sam Štefekov aparat i natočil svakom po kupicu. Puran kojeg sam donesel za kamuflažu šetal je okolo i zobal kuruzu kaj sam ju prosipal po podu.
– Ja san Jakov – predstavil se Dalmoš i pružil ruku na pozdrav dok se oprezno ogledaval naokolo.
– Martin – odgovoril sam i zdrmal mu ruku onak, praf muški.
– Čujem da bi ti štel kupiti onog mog aparata za otkrivanje dronova. Znaš, ak ti to prodam, moraš zaprti gubec i ne smeš preveč naokolo povedati kaj imaš i gde si to nabavil. Razmeš? Jer, ak to čuje neko ko ne treba, onda se zna kaj nam sledi. Rešt i globa.
– Ma niš se ne boj, Jakov je čovek i pol. Bil sam s familijom kod njega na godišnjem. Moja Barica je saki dan išla z decom na kupanje, a mi smo dva onda otišli u njegovu konobu jer se samo tam moglo skriti od vručine i popiti koju kupicu dok se baba ne vrne sa plaže. Samo, znaš, ni baš veselo piti vino po skrivečki, dok se celo vreme bojiš jel bu naletel neki dron. Jemput sam mu rekel za ovo kaj je tvoj Štefek zmislil i od onda me zove saki ibogi dan da ga otpeljam do tebe.
– Ma ne bojte se, šjor Martine, nisan van ja tako lud da puno pričan. A bija san, dok san bija mlađi. Priča san ča triba i ča ne triba, di triba i di ne triba. Sve dok nisan u jednon društvu ispriča oni vic o Europskon parlamentu i kokošama. Ni prošla ni minuta kad se isprid mene stvorija policijski robot i odveja me pravo u pržun. Dvi godine, a globa da me glava još i sad boli kad se sitin. Od onda gledan svoja posla i držin jezik zazube. Ova vaša makinja mi triba jer ću više izludit od straja svaki put kad oću popit. Ono kad su zabranili pušit duvan, to san još nekako i podnija, ali kad je Europski parlament donija zakon da se grozje smi koristit samo ka voće, a da se zbog narodnog zdravja i velog troška za ličenje od alkoholizma zabranjuje proizvodit i pit vino i rakiju, to me dotuklo. Znate, ono jedino ča još nisu zabranili, one lake droge, ni to za nas starije, to je više nešto za mulariju. Najgore je kad se skupi klapa kod mene u konobu i oće zapivat uz žmul vina. Morete mislit kakva je to pisma kad cilo vrime gledaš oće li doletit neki dron. Tih policijskih beštija sve je više i sve su sitniji, sve ih je teže za vidit i čut. A i od ovih furešti ča nan liti dolazu, ne znaš koji je čovik, a koji je špija. Šjor Martine, spasite.
– Naj se ti, Jakov, niš sekirati, vidim da si čovek na mestu, da bi reč rekel. Prodam ti tog aparata, ali prvo bumo si spili još koju kupicu. Z ove kleti još nihče ni žalosten, a bormeč ni žeden doma odišel.
I taman kad sam štel poslu nazdraviti, zableščal je Osel, u niskonaponskom polju za informacije pojavila se ona lepa puca kaj čita službene obavesti i slatkim glasom zacvrkutala kak se sadnja trsja i šljiva skroz na skroz zabranjiva jer da je to jedini način da se obustavi ilegalna proizvodnja alkoholnih pijač. A ak nehče prekrši of novi zakon, sledi rešt i globa.
– Ti bokca – zakričal je Franc i skinul sve svete z nebesa – bormeš smo nahrdali! Pa z čega bumo sad vino i rakiju delali. Časna reč, bunu treba dizati, kak Gubec!
– Jemate prav, šjor Franc – zapalil se i Jakov – a ovi put će se pridružit i cila Dalmacija, sve sa Zagoron i otocima. Ovo ča nan činidu ne more se više trpit! Mi smo tamo doli mirni judi, ma kad nam udari trenta un u glavu, boje da nas se čuvadu oni u Briselu!
– Mir, dečki, mir – prekinul sam ih taman kad su šteli zet štihače v ruke. – Istina, Gubec je dignul bunu, al se setite kak je na kraju prošel. Ne vredi se z jačim puntati. Tu ne pomaže galama neg samo pamet i trezna glava. I da vas odmah umirim bum vam rekel kaj mi je moj Štefek povedal dok smo se neki dan čuli prek Skajpa. Rekel je da opet slaže jen novi aparat i samo kaj ni gotov. Tehnologija je, veli, tu pri nas već čudaj let praf za praf poznata, samo je treba neke stvari malo spredelati. Naši stari su u vino vodu mešali, a njegov novi aparat bu – z vode vino delal!
Ovi dva su najemput u čudu začkomeli, a gupci su im se obesili kak mokre čarape na štriku. Negde u daljini dronovi su tiho zujali, prvi kokotiček je zakukurikal, a sončece se fakinski naluknulo iza brega. Ja sam polako dignul u zrak trilikum moga dedeka. Of ga je dobil na poklon od svog prijatela, nekog Mireka, koji je bil grabancijaš i poet i koji mu je na trilikum, malo pod gasom, napisal – „nigdar ni bilo da ni nekak bilo!“. Natočil sem do vrha, otpil gutljaj i dodal Jakovu.
